បែកធ្លាយសារវិមានក្រឹមឡាំង ប្រធានាធីបតីរុស្ស៊ី លោកវ្ល៉ា ឌឹមៀរពូទីន កំពុងមានផ្ទុកជំងឺមហារីកលំពែងដំណាក់កាលទី១ និងជំងឺផាកឃីនសុន។
សារដ៏គួរឲ្យភ្ញាក់ផ្អើល និងរសើបបំផុតរបស់វិមានក្រឹមឡាំង ដែលត្រូវបានមើលឃើញដោយភ្នាក់ងារកាសែតឌឹសាន់នៅសប្តាហ៍នេះ បានធ្វើឲ្យពិភពលោកសង្ស័យកាន់តែខ្លាំង និងតាមដានជុំវិញសុខភាពរបស់មេដឹកនាំរុស្ស៊ីលោកពូទីន។ បុរសខ្លាំងវ័យ ៧០ឆ្នាំរូបនេះ ត្រូវបានសារបែកធ្លាយនិយាយថា “គាត់ត្រូវបានគេធ្វើរោគវិនិច្ឆ័យថាមានជំងឺផាកឃីនសុន និងមហារីកដំណាក់កាលដំបូង ខណៈវាកំពុងតែវិវឌ្ឍទៅមុខហើយ”។ ដោយបន្តថា “ការពិតនេះនឹងត្រូវបានបិទបាំងបដិសេធតាមគ្រប់មធ្យោបាយទាំងអស់”។
ប្រភពបែកធ្លាយហាក់ដូចជាបុគ្គលដែលមកពីសេវាស៊ើបការណ៍សម្ងាត់រុស្ស៊ី មិនបញ្ចេញឈ្មោះ បានតបសារអ៊ីម៉ែលនោះបន្ថែមទៀតថា “លោកពូទីនត្រូវបានចាក់បញ្ចូលជាប្រចាំជាមួយនឹងថ្នាំស្តេរ៉ូអ៊ីតធុនធ្ងន់គ្រប់ប្រភេទ និងការចាក់ថ្នាំបំបាត់ការឈឺចាប់ប្រកបដោយភាពច្នៃប្រឌិត ដើម្បីបញ្ឈប់ការរីករាលដាលនៃជំងឺមហារីកលំពែងដែលគាត់ត្រូវបានគេធ្វើរោគវិនិច្ឆ័យថ្មីៗនេះ”។ “វាមិនត្រឹមតែធ្វើឲ្យមានការឈឺចាប់ច្រើននោះទេ លោក Putin ក៏មានសភាពហើមមុខ និងជួបប្រទះផលប៉ះពាល់ផ្សេងទៀត រួមទាំងការភ្លេចភ្លាំងផងដែរ”។
ទោះបីជាយ៉ាងណាក៏ដោយ វានៅតែជាព័ត៌មានមិនទាន់ឯករាជ្យ ខណៈដែលរដ្ឋាភិបាលរុស្ស៊ីបានច្រានចោលយ៉ាងដាច់អហង្ការនូវរាល់ពាក្យចចាមអារ៉ាម។ វិមានក្រឹមឡាំងបាននិយាយរួចហើយថា ពូទីនមិនមានឈឺអ្វីទេ គាត់មានសុខភាពល្អជាធម្មតា៕
ប្រភព៖ The SUN
ប្រភពរូប៖The SUN
ប្រែសម្រួល៖សុខ តុលា
